Omutendesi wa Arua Hill awangudde Onduparaka n’afuna ku buweerero
Livingstone Mbabazi owa Arua Hill nga puleesa emulinye
Arua Hill 2-1 Onduparaka
Omutendesi wa Arua Hill, Livingstone Mbabazi yafunye ku buweewero oluvannyuma lw’okufuna wiini esooka mu mipiira ena egisembyeyo. Arua Hills ebadde emaze emipiira ena nga tewangula mu liigi ya babinywera eya StarTimes Uganda Premier League, ekibadde kitadde Mbabazi ku bunkenke.
Eggulo ku Ssande, baamezze Onduparaka ggoolo 2-1 omupiira ogwabaddeko n’obugombe ku kisaawe ky’e Barifa mu maka ga Arua Hill.
Batabani ba Mbabazi babadde baasemba kuwangula UPDF wabula emipiira ena egisembyeyo, ebadde ekubwa bukubwa. Ku gino kuliko ogwa URA (1-0), Vipers (1-0), SC Villa (1-0) ne Gadaffi (2-0).
Ggoolo za Arua Hill zaateebeddwa Reagan Mpande mu kitundu ekyokubiri ng’ava katebe n’abafunira obuwanguzi. Obuwanguzi buno bwatadde Arua Hill mu kifo kyomusanvu ku bubonero 13 sso nga Onduparaka y’ekoobedde mu liigi eno.
Arua Hill ezzaako Express ku Lwokutaano nga December 2 sso nga Onduparaka yaakuzannya KCCA ku lunaku lwe lumu.
