Katale Progressive ewangudde empaka z’omupiira gwa “soccer watoto”.

Empaka z’omupiira gw’ebigere eza Watoto wa soccer zicamudde abatuuze b’e Makerere.

Zino ezimaze ennaku bbiri nga ziyinda ku kisaawe kya Makerere play ground zeetabiddwaamu ttiimu 96 era zaasambiddwa abo abali wansi w’emyaka 13 egy’obukulu.

Emu ku ttimu eyacamudde ennyo abantu yabadde ya Anna Marrie esangibwa e Kyengera Mugongo olw’ebitone eby’enjawulo abazannyi baabwe bye baayolesezza mu mpaka zino.

Empaka zino zaagenze okukomekkereza nga Katale Progressive y’esitukidde mu zino bwe yamezze Noble stars goolo 2 ku 0 ate nga mu mupiira gwa bawala Arrows yamezze El cambio 3:2 era ng’abawanguzi bombi baaweereddwa ebikopo. 

Francis Bateyireho, omu ku baakulidde empaka zino yategeezezza nti empaka zino zisambibwa buli mwaka nti era zaagenderwamu kutumbula byamizannyo mu ggwanga.

Edward Nakabaale, nnannyini ttiimu y’omupiira eya Anna Marrie eyacamudde ennyo abantu yasiimye abategesi b’empaka zino ze yagambye zaabayambye okumanya awali amaanyi n’obunafu bwabwe.