Yasin yesuunga ngule ya Afrika.
YASIN Nasser ne Ali Katumba amusomera maapu mu Ford Fiesta R5 MK2 bezizza entikko y’engule ya Afrika eya Africa Rally Championship (ARC) lwokumalira mu kifo kyakusatu mu mpaka za Shell V-Power 2023 Pearl of Africa Uganda Rally.
Wadde baamalidde mu kyakusatu ku bavuzi 28 abeetabyemu, Yasin Nasser ye yakulembedde abataano abaabadde bavuganya ku ngule ya Afrika (ARC) okuli; Jas Mangat, Mike Mukula Junior, Rio Smith ne Innocent Bwamiiki.
Mu mpaka za Pearl Nasser yafunye obubonero 30, abadde alina 24 kati akulembedde na 54, Mangat yafunye 21, abadde alina 21 n’aweza 42 ate Patel ataavuze yasigadde ku bubonero 30 mu kifo ekyokusatu.
Mmotoka ya Nasser yakutuse siteeringi ne basubwa okuvuga siteegi emu kw’ezo 12 ezaavugiddwa era ne bakubwa penati ya ddakiika 10, ate Mangat naye emmotoka yakutuse ekyuma ekitambuza amafuta naye naasubwa siteegi bbiri era n’akubwa penati ya ddakiika 20.
“Ekigendererwa kyaffe ekikulu ky’abadde kufuna bubonero ku ngule ya Africa era tukituukirizza era tetugenda kuva ku mulamwa okutuusa ng’ekirooto kituukiridde,” Nasser bwe yategeezezza.
Eza Pearl zaabadde mpaka zaakusatu ku ngule ya Africa ate ku wiikendi eno (Lwamukaaga ne Ssande), Nasser ne Katumba bagenda kwetaba mu mpaka za Afrika ez’omulundi ogwokuna eza Iringa Rally mu Tanzania.
