Proscovia awandudwa mu ttiimu .
Kaputeeni wa She Cranes Peace Proscovia si waakubeera ku ttiimu y’eggwanga eya She Cranes egenda okwetaba mu mpaka z’ensi yonna eza Netball World Cup ez’okubeera mu Cape Town ekya South Africa omwaka guno.
Bino bikakasiddwa kiraabu ye eya Surrey Storm eya Bungereza nga okuzinziira ku kiwandiiko ekifulumiziddwa kiraabu ye kiraga nti Peace si waakuzannya mipiira gyonna gisigaddeyo sizoni okutuusa nga amaze okussuuka obuvune.
Bino olugudde mu matu g”mutendesi wa She Cranes Fred Mugerwa n’asalirawo entotto ku ngeri y’okuziba eddibu lya Peace n’alagira omuteebi wa KCCA Mercy Batamurinza okwegatta ku ttiimu amangu ddala.
Batamurinza oluyitiddwa ku ttiimu n’ategeeza nga bw’agenda okulwanira ennamba ku ttiimu okutuusa nga asigadde ku ttiimu ey’enkomeredde.
“Mmanyi nga nnina obusobozi obubeera ku ttiimu ya She Cranes. Kye nnina okukola kuteeka batendesi bye bangamba mu nkola okulaba nga nsigala ku ttiimu,” Batamurinza bwe yategeezezza.
Peace Proscovia azannyira mu Surrey Storm eya Bungereza ye pulofesono owookubiri atagenda kwegatta ku ttiimu ya She Cranes nga yeegasse ku Stella Oyella azannyira mu Sirens eya Scotland eyasooka okuva ku ttiimu olw’obuvune.
Kino kitegeeza nti She Cranes esigaza pulofesono omu Mary Nuba azannyira mu Loughborough Lightning eya Bungereza.
Zo empaka za Netball World cup zakubeera mu Cape Town ekya South Africa okuva nga July 28-06 August nga Uganda eri mu kibinja ekyokuna omuli New Zealand, Trindad and Tobago ne Singapore.
