Batadde Mayanja ku nninga yeetonde ku by’okulangira ddiifiri.
Akakiiko akakwasisa empisa aka FUFA Competitions Disciplinary Panel (FCDP) leero lwe kasuubirwa okufuna ebbaluwa okuva eri omutendesi wa KCCA, Jackson Mayanja oluvannyuma lw’okusiiwuuka empisa ku mupiira gwa Vipers ku Lwokutaano oluwedde.
FUFA yawandiikira Mayanja ku Ssande ng’emuwa nsalesale wa leero ku Mmande ssaawa munaana okuzzzaayo ebbaluwa okwetonda ku lw’ebyo bye yayogera ku nsiike eyali eya kasammeeme e Kitende.
Vipers, yamegga KCCA 1-0 eyateebwa Milton Karisa mu ddakiika ey’e 88 n’ebawa obuwanguzi ku Lwokutaano ekintu ekyaggya Mayanja mu mbeera n’alangira ddiifiri Mashood Ssali eyaguli mu mitambo nga bwe yali ow’ekiboggwe.
Mayanja ne batabani be baava mu mbeera ng’omupiira guwedde ne balumba ddiifiri n’okwagala okumugajambula okukkakkana ng’omuteebi wa KCCA Simon Tshisungu Kankonde aweereddwa kkaadi emmyufu olw’okukuba ddiifiri ekikonde.
