Micho aweereddwa emipiira ebiri – Magogo .
Ekibiina ekiddukanya omupiira ogw’ebigere mu Uganda ekya FUFA, kikakasizza nti omutendesi wa ttiimu y’eggwanga eya Uganda Cranes, Milutin Micho Sredojevic, wakusigala ng’atendeka ttiimu eno okutuuka ku nkomerero y’empaka za Africa Cup of Nations eziribeera mu Ivory Coast omwaka ogujja 2024.
President wa FUFA, Eng Moses Magogo abadde mu lukungaana lwa bannamawulire olutudde ku kitebe kya FUFA e Mengo mu Kampala, nakakasa nti Micho wakusigala ng’atendeka ttiimu mu mipiira 2 egisigaddeyo ku mpaka z’okusunsulamu, n’oluvanyuma bakumukubamu ttooki nga emipiira egyo giwedde.
Mu mpaka z’okusunsulamu, Uganda Cranes eri mu kibinja F naye emikisa gyayo egy’okukiika mu mpaka ezakamalirizo gikyali mitono, bannayuganda kye besigamizza ku mutindo ogw’ekiboggwe ogw’omutendesi Micho.
FUFA yalonda Micho ku mulimu guno mu 2021 kundagaano ya myaka 3.
Guno gwali mulundi gwakubiri, yasooka natendeka Uganda Cranes wakati wa 2013 okutuuka 2017.
