Olutalo lw’ekikopo kya liigi ya Volleyball lusitudde ekundi.
Olutalo lwa ttiimu bbiri ezeesogga fayinolo za liigi ya Volleyball ey’oku ntikko lusajjuka leero mu kisaawe ekibikke ekya Old Kampala Arena.
Akakunizo mu nsiike za leero kali wakati w’abasajja ba Orange Block Busters (OBB) abaaleka ttiimu endala nga tezimatidde sizoni ewedde bwe beetaba mu liigi eno omulundi ogusooka ate nebasitukira mu kikopo.
Bano akalulu ka ‘Playoffs’ kaabasudde ku Sport-S eyakulembedde ekibinja n’obubonero 50 mu nsiike 18 ng’ekubiddwaamu ttiimu emu yokka (UCU Doves 3-1), OBB bwe battunka tekoze bulungi mu kininja bwe yamalidde mu kyokuna n’obubonero 36 n’ekubiddwa ensiike 6 ku 18.
Sizoni eno OBB ekubye Sport-S ensiike zombi mu kibinja 3-0 (25-23, 25-16, 25-14) ne 3-1 (25-17, 25-20, 23-25, 25-22). Bazzeemu okwesanga ku ‘Playoffs’ nga Sport-S eyagala kubadda mu biwundu ate OBB enoonya kwesasuza.
Ababiri bano era beesanga ku mutendera gwe gumu ‘Playoffs’ sizoni ewedde, OBB neewandulamu Sport-S ng’ewangudde ensiike (2-0) ku ssatu ze baalina okwezannya.
Olutalo olulala be bakazi ba OBB nga battunka n’aba Sport-S wakati nga buli omu eyagala kunuubula munne okutangaaza emikisa gy’okwesogga fayinolo z’omwaka guno.
Bano mu gy’ebibinja sizoni eno Sport-S yawangula ensiike zombi 3-1 (25-17, 25-22, 22-25, 25-22) ne 3-2 (15-25, 25-20, 25-23, 21-25, 17-15).
OBB erina obusungu ku mutendera guno, wabula omutendesi waabwe Johnson Kawenyera agamba nti ekisinze okumutawaanya sizoni eno bwe buvune bw’abazannyi empagiluwaga naye bagenda kukola ekisoboka okwesogga fayinolo.
