Uganda Cranes ekubiddwa Tanzania Taifa stars.
Essuubi lya ttiimu y’eggwanga ey’omupiira ogw’ebigere eya Uganda Cranes ery’okukiika mu mpaka za Africa Cup of Nations ez’omwaka ogujja mu Ivory Coast, lyongedde okukeewa bw’ekubiddwa Tanzania Taifa Stars goolo 1-0.
Mu mupiira guno ogubaddeko n’obugombe, goolo ya Tanzania Taifa Stars eteebeddwa Simon Msuva mu dakiika eye 68.
Omupiira Uganda Cranes egukyalizza mu kisaawe kya Suez Canal Authority Stadium mu kibuga Ismailia e Misiri, olw’okuba Uganda terina bisaawe bitukana namutindo.
Abamu ku bazannyidde Uganda Cranes mu mupiira guno ye Emma Okwi, Azizi Kayondo, Salim Jamal, Miya Farouk, Allan Okello, Joseph Ochaya, Siraje Ssentamu, Kenneth Ssemakula, Khalid Aucho, Livingstone Mulondo n’abalala.
Kati Uganda Cranes egenda kuddamu okuddingana ne Tanzania ku lw’okubiri lwa wiiki ejja nga 28 march,2023 mu kisaawe kya Benjamin Mkapa mu kibuga Dar el Salaam e Tanzania.
Algeria ekulembedde ekibinja F n’obubonero 9, Tanzania yakubiri n’obubonero 5, Niger yakusatu n’obubonero 2 ate nga Uganda esembye n’obubonero 2, nga buli ttiimu yakazannya emipiira 3 mu kibinja kino.
