Kobs yetisse obuwanguzi mu liigi ya rugby.
Obuwanguzi Kobs Rugby Club bwe yafunye ku Jinja Hippos yabuggye mu mannyo ga mpisi oluvannyuma lw’okuva emabega okuwangula ku bugoba 29-14. Mu kitundu ekisooka, Jinja Hippos yakimazeeko y’ekikulembedde 14-10 kyokka ebintu ne bigyekyusiza okukkakkana ng’ekubiddwa. Obuwanguzi buno bwayambye Kobs okutangaaza emikisa gyayo okusitukira mu kikopo kya liigi ya babinywera eya rugby sizoni eno. Omupiira guno gwazannyiddwa ku kisaawe kya Dam Waters e Jinja ku Lwomukaaga.
Kobs ye yasoose okukulembera omuzannyo guno (10-0) mu ddakiika 10 ng’eyitira mu Pius Ogena n’abazannyi abalala. Wabula Jinja Hippos n’efuna ggoolo za mangu okuva ewa Tawfiq Bagalana ne Moses Hatim wamu n’ebisobyo bya John Echweru nga tebannawummulamu.
Wabula omutendesi wa Kobs, Brian Makalena enzaalwa ya South Afrika yakozeemu enkyukakyuka n’aleetamu Collins Kimbowa ne Byron Oketayot abaateebye ggoolo z’amangu. Wabula aba Hippos, amaanyi gaabawedde Ogena bwe yabateebye ggoolo endala bbiri n’ebisobyo bya James Ejongat bisatu ebyawadde Kobs essuubi ly’okusitukira mu liigi y’omwaka guno.
“Twategedde nti olugendoa lw’e Jinja lugenda kutubeerera luzibu era kino kyatuwadde amaanyi ne tukolera wamu ne kituyamba okugirumba nga tetugikkiriza kutujooga mu kitundu kyokubiri,”Makalena bwe yagambye oluvannyuma lwa ttiimu ye okuweza obubonero 49 mu mupiira 11.
“Kino tukitutte nga kyakuyiga nga tuzannya ttiimu ennene mu liigi. Ku luno twafunye ekyokuyiga singa obeera okulembedde omuzannyo,” Said Atibu atendeka Jinja Hippos bwe yagambye.
Hippos yasigadde mu kyakutaano n’obubonero 24 ng’eddiriddwa Impis abaakubye Rams (11-5). Heathens nayo yeeyongedde okussa akazito ku Kobs abakulembedde liigi bwe baafunye obuwanguzi bwa 31-7 ku Rhinos.
Heathens kati nayo erina 49, n’eddirirwa Pirates ku 47 oluvannyuma lw’okukuba Buffaloes (eyookuna) 21-3. Heathens be bannantameggwa ba liigi abaagiwangula nga tebakubiddwa sizoni ewedde.
