Kiplimo agudde mubintu,fortebet emuwade engule yomuzannyi w’omwezi.
Jacob Kiplimo ayongedde okugwa mu bintu bw’asitukidde mu ngule ya ‘Fortebet Real Star Monthly Award’ ey’omwezi oguwedde.
Kiplimo w’awangulidde engule eno nga kyajje alangirirwe ku ngule ya USPA, ekibiina ekitwala bannamawulire abasaka ag’emizannyo nga munnabyamizzanyo eyasinze omwezi oguwedde.
Omukolo gubadde ku kitebbe kya Jude Colour Solutions mu Kampala emu ku kkampuni ezivujjirira engule zino.
Engule zombi z’awangudde wiiki eno zivudde ku mutindo gwe yayolesezza ng’awangula omudaali gwa zzaabu mu misinde gy’ensi yonna egya World Cross Country Championship.
Emisinde gino gyayindidde mu kibuga Bathurst mu Australia nga February 18 omwaka guno. Kiplimo yagiddukidde eddakiika 29:17 n’addirirwa Berihu Aregawi owa Ethiopia olwo Joshua Cheptegei n’amalira mu kyokusatu ku dakiika 29:37 n’akomawo n’omudaali gw’ekikomo.
Mu balala abawangudde mwe mwabadde Yasin Naser eyeetisse abavulumuzi ba mmotoka z’empaka olw’okuwangula empaka za Mbarara Rally. Ali Katumba amusomera mmaapu yaggyeeyo engule yaabwe.
Rodger Mugisha omuwuttanyi wa ttiimu y’eggwanga eyabatasussa myaka 20 Uganda Hippos amezze ab’omupiira. Fadilah Shamika asinze aba Badminton, Pius Ogena n’awangula aba Rugby ate Jannon Otto yasinze aba Basketball.
Otto mu kiseera kino yaddayo mu Amerika ng’akiikiriddwa Victoria Ntale, maneja wa Gazelles.
Resty Mbatidde amyuka omwogezi wa Fortebet ne Kamilla Namata owa Jude Colour Solutions nabo beetabye ku mukolo guno.
