Kiplangat ne Chesang bali kuza ‘Source of the Nile Marathon’.
Omuddusi w’embiro empanvu Hosea Kiplangat awangudde emisinde gy’okutolontoka ebyalo egya kiromiita 21 egya Source of the Nile Half Marathon egiyindide mu disitulikiti y’e Jinja.
Abaddusi baasimbuddwa ku Bell Avenue okutolontoka ebitundu by’e Jinja ebyenjawulo nga we giggweeredde nga egy’abasajja giwanguddwa Hosea Kiplangat owa Prisons eyaddukidde essaawa 1:8:28.
Ben Somikwo yamalidde mu kyakubiri ate ye Levi Kiprotich yamalidde mu kyakusatu nga bonna ba kiraabu ya Prisons.
Ku mutendera gw’abakazi guwanguddwa Doreen Chesang ow’ekitongole ekikuuma ebisolo ekya Uganda World Life Authority (UWA) nga addukidde essaawa 1:12:24.
Annet Chelangat owa Prisons yamalidde mu kyakubiri nga Rebecca Cheptegei owa kiraabu ya UPDF yamalidde mu kyakusatu.
Oluvannyuma abawanguzi mu mitendera gyombi buli omu yakwasiddwa ceeke ya bukadde bubiri nga abakutte ekyokubiri buli omu yafunye akakadde kamu nga abokusatu buli omu yafunye emitwalo 70.
