Gazelles leero ettunka ne Kenya .
Leero ttiimu y’eggwanga ey’abawala ba basketball, lw’etandika ku lugendo lw’okulwanira ekikopo ky’ezokusunsulamu ttiimu za Zone V ezineetaba mu za Afrika (Women Afrobasket) eziribeera mu Rwanda.
Ez’okusunsulamu zino ziri mu kisaawe ekibikke ekya MTN Arena e Lugogo mu Kampala nga Uganda eggulawo ne Kenya ate South Sudan bubeefuke ne Misiri wakati nga ttiimu zonna zirwanira ekifo kimu kyokka ekya ttiimu erina okwegatta ku Rwanda abategesi b’eza Afrika wakati wa July 28 ne August 6, 2023.
Ku bazannyi 17 ababadde mu nkambi nga batendekebwa; Zainah Lokamweri, Perus Nyamwenge, Agatha Kamwanda, Rebecca Suzan Anyu, Anella Namirimu, Moureen Amoding, Sarah Namale baasaliddwaako.
Enkambi yeeyongeddeko bapulo babiri okuli; Maria Najjuma ezannyira mu Richmond (Atalanta, Georgia) eya America ne Jannon Otto okuva mu Musel Pikes mu kibuga Luxembourg ekya Bulaaya.
Amawanga okuli; Uganda, Rwanda, Misiri, Kenya ne South Sudan ge geetabyemu oluvannyuma lwa Tanzania, Burundi, Ethiopia, Somalia ne Djibouti okulemererwa okujja.
