Ttiimu ya Peace emezze eya Oyella mu liigi ya Bungereza .

Peace Proscovia kapiteeni wa She Cranes ayanirizza munannayuganda munne Stella Oyella na bukambwe bwa ggoolo 68-56 mu nsiike ey’agguddewo liigi ya Bungereza.

Eggulo,liigi ya Bungereza ey’oku ntikko mu kubaka bwe yaggyiddwaako akawuuwo n’ensiike ttaano mu kisaawe kya Motorpoint mu kibuga Nottingham ekya Bungereza.

Oyella ye muzannyi wa She Cranes abadde yaakegatta ku Strathclyde Sirens ezannyira mu liigi ya Bungereza mu October w’omwaka oguwedde. Eno ye yabadde ensiike ya Oyella esooka mu liigi nga Strathclyde Sirens ekubwa Surrey Storm Netball club (68-56) Peace Proscovia mw’azannyira.

Mu nsiike eno Peace Proscovia owa Surrey Storm ye yasinze okuteeba ggoolo ennyingi (48) n’addirirwa Bethan Goodwin (35) ne Niamh McCall (20) aba Strathclyde Sirens wabula Oyella yayingidde mu ddakiika ezisembayo n’ateebayo ggoolo (1) yokka.

Mu ngeri y’emu omuteebi wa She Cranes omulala Mary Nuba Cholhok naye yabadde mu nsiike ng’ayambako ttiimu ye eya Loughborough lightning okumegga Team bath (86-52).

Enkya Mmande, Peace Proscovia akomawo mu nsiike ya sizoni eyookubiri nga Surrey Storm ettunka ne Severn Stars mu kisaawe kya Surrey Sports Park.

Loughborough Lightning y’ekulembedde n’enjawulo ya ggoolo 34 ku bubonero 3 bwe yenkanya ne Manchester Thunders abalina ekikopo kya sizoni ewedde, London Pulse, Surrey Storm ne Severn Stars.