Yassin Nasser alumbye Kenya n’ekyuma ekipya.
Yassin Nasser alumbye Kenya n’ekyuma ekipya.Ono ye munnayuganda yekka asuubirwa okwetaba mu mpaka eziri mu mutendera gwa Africa (African Rally Championship) ezigenda okubeera mu Ivory Coast, okwetaba mu z’e Kenya, ayagadde kwegezesaamu ng abwe yeetegekera ARC.
Sizoni eziyise Nasser abadde avuga mmotoka ekika kya Subaru Impreza GVB, wabula sizoni eno yasabuukuludde kapyata w’emmotoka ekika kya Ford Fiesta R5 MK2.
“Emmotoka eno nkyetaaga obudde obumala okugiyiga obulungi y’ensonga lwaki ku ntandikwa y’omwaka guno neetaba mu zaakafubutuko ezaali e Busiika, wiiki bbiri emabega neetabye mu z’okwegezaamu e Garuga kati nnumbye Kenya,” Nasser bwe yategeezezza.
Ono ye kyampiyoni w’engule ye ggwanga (National Rally Championship) 2019, omulundi guno tagenze ne Ali Katumba abadde amusomera maapu wabula akyusizza n’addamu okuyita Joseph Kamya eyamusomerako emabega.
Empaka za Afrika zisuubirwa kuvugibwa wakati wa February 24 – 26, 2023 mu kibuga Yamoussoukro ekya Ivory Coast.
“Bwe tumala eza Kenya tugenda kweyongerayo butereevu okwetaba mu za Afrika era zino tuzikozesezza ng’ezookwegezesaamu,” Nasser bwe yayongeddeko.
