Ttiimu z’okubaka zitandise okwetegekera ekitundu kya liigi ekyokubiri.

Akakiiko akategeka liigi y’eggwanga ey’okubaka eya National Netball Super League kakakasizza nga liigi bw’egenda okuddamu ku Lwokusatu lwa wiiki ejja nga January 18.

Emipiira ena gye giggulawo liigi eno nga KCCA abakulembedde baggulawo ekitundu ekyokubiri ne Busia Greater Lions, Police ettunke ne Prisons, UPDF ne UCU ate UgX Luweero eyambalagane ne Africa Renewal University. Emipiira gyonna gyakubeera ku kisaawe ky’amakomera e Luzira amaka ga Prisons.

Akulira olukiiko olutegeka liigi y’okubaka, Michael Kakande yategeezezza nti akatale k’okukyusa abazannyi kakomekkerezebwa ku Lwamukaaga luno (January 15) bw’atyo n’asaba abazannyi ne kiraabu zonna okutuukiriza obukwakkulizo obwetaagisa okugula n’okutunda abazannyi mu budde.

KCCA ekulembedde n’obubonero 22 mu mipiira 11, NIC yaakubiri n’obubonero 18 nga basibaganye ne Prisons abali mu kyokusatu nga Makindye Weyonje y’eri mu kyokuna n’obubonero 16.