Oweebikonde asitukidde mu ngule.
Omuggunzi w’eng’uumi Ukasha Matovu amezze bannabyamizannyo abalala ku ngule ya ‘Fortebet Real Star Monthly Award’ ey’omwezi oguwedde.
Matovu 22 ng’ebikonde abizannyira COBAP Boxing Club, yamezze Joshua Tukamuhebwa kapiteeni wa ku ttiimu y’eggwanga The Bombers kw’ossa Shafic Lusojo owa Lukanga Boxing Club.
Kiddiridde omutindo gwe yayolesezza mu liigi y’eggwanga eya UBF Boxing Champions League. Ku fayinolo eyabumbujjidde ku Akamwesi Mall e Kyebando nga December 26, Ukasha yakubye Owen Kibira abadde nnamba emu w’eggwanga mu buzito bwa ‘Welter’ (kiro 69) n’amunoza. Lawrence Kalyango omutendesi wa COBAP ne ‘The Bombers’ ye yawerekeddeko Matovu okufuna engule eno.
Mu balala abawangudde Patrick Kaddu owa Kitara FC eya FUFA Big League yamezze aboomupiira olw’okugitebeera ggoolo 4 omwezi oguwedde mu mipiira 4 sso nga y’akulembeddemu abateebi ku ggoolo 14 mu mipiira 14. Engule ye yaweereddwa mukyala we Aisha Namatovu.
Abalala abaawangudde kuliko; Christine Namulumba Kango (kubaka), Prisca Chesang Chemweno (misinde), Chris Lubanga (rugby), Fadilah Shamika (badminton) ne Frank Nsubuga (cricket). Omukolo gwabadde ku Route 256 e Lugogo nga gwetabiddwaako Alex Muhangi ambasada wa Fortebet, Resty Mbatidde amyuka omwogezi wa Fortebet, Henry Zzimbe owa Jude Colour Solutions ne Isaac Mukasa omutegesi
