Isabirye ategeezezza nti balina okulinnyisa omutindo .
Omutendesi wa BUL FC,Alex Isabirye yavudde ku kisaawe e Wankulukuku nga mukambwe nga ennumba oluvannyuma lw’okukubwa Express (1-0) mu liigi.
Ng’ebula eddakiika bbiri zokka omupiira gukomekkerezebwe, Isabirye yadduse mu kasenge nga yeewala okwogera ne bannamawulire nga bweri enkola ya Jose Mourinho owa Roma adduka mu kasenge ng’omupiira tegunnaggwa.
Obwedda Isabirye awa abazannyi be ebiragiro wabula nga tebabituukiriza ekyamutabudde natandiika okubaliira obuwuka.
Mu kitundu ekisooka abazannyi ba BUL emibiri gyabadde wansi wabula mu kyokubiri balumbye Express ne baginywesa amazzi kuba Isabirye yamazeeeyo abateebi bonna okwabadde Frank Kalanda,Ibrahim Nsimbe ne Karim Ndugwa.
Gye byaggweredde nga bakubiddwa 1-0 ne basigala waggulu ku kimeeza kya liigi n’obubonero 14 .Isabirye agamba nti balina okulinnyisa omutindo bwe baba baakuvuganya ku bikopo sizoni eno.
