Nanziri kati ayagala kulwanira musipi.
Nanziri ye Munnayuganda omukazi eyasooka okukiikirira Uganda mu Olympics.
Oluvannyuma lw’okuwangula olulwana lwe n’Omutanzania Sandra Muhamed, Catherine Nanziri agambye nti kati obwanga abwolekezza kulwanira misipi mu nnwaana eziddako.
Nanziri, 22, yakubye Muhamed ku bugoba 180-162 mu lulwana olwabumbujjidde ku PTC Bar and Lounge e Bulenga mu kiro ekyakeesezza ku Lwomukaaga.
Ababiri battunkidde mu buzito bwa ‘Super Fly weight’ laawundi 6, Nanziri ze yeefuze okuva ku ffirimbi eyasoose.
Luno lwabadde lulwana lwa Nanziri lwakubiri mu bikonde ebya pulofesono era kati atunuulidde kuvuganya ku misipi egy’enjawulo ng’atandikira ku gwa East and Central Africa gw’agenda okuvuganyaako mu bbanga eritali ddene.
Nanziri ye Munnayuganda yekka omukyala eyali akiikiriridde eggwanga mu bikonde mu mizannyo gya Olympics kye yakoze mu gyabadde e Japan omwaka oguwedde.
Maneja we Acram Iga yategeezezza Bukedde nti bali mu nteeseganya n’ekibiina kya ABU (Africa Boxing Union) ekitwala ebikonde mu Afrika okutegekera omulwanyi olulwana lw’omusipi gye bujja mu maaso.
Mu balala abazannye Stanley Mugerwa yakubye Tom Muwanguzi mu buzito bwa Super welter weight, Joshua Male yakubye Saidi Charcoal, Rosette Nakigudde yalemaganye ne Grace Nabasumba mu buzito bwa bantam n’ennwaana endala.
