Kiraabu ya UPDF ey’ebikonde ereese ttiimu kabiriiti okuvuganya mu mpaka ez’enjawulo.
UPDF Boxing Club, ereese ttiimu kabiriiti egenda okugikiikirira mu mpaka z’eggwanga ez’enjawulo.
Ttiimu yasoose mu mpaka ezaasunsudde abazannyi abapya abaasuumusiddwa ku ttiimu enkulu, era omutendesi Tonny Ssekabira alabudde kiraabu endala nga bwe bagenda okuddamu okuzifufumya mu bikonde.
Empaka z’okusunsulamu zaabadde ku kisaawe kya Bombo Army SS mu disitulikiti y’e Luweero, nga zetabiddwaamu abazannyi abaasobye mu 100.
Abazannyi okuli Harold Mukuye, Karim Seguya, James Japem, Abdul Hakim, Isaac Mave n’abalala, basuumusiddwa okwegatta ku; John Owino (kapiteeni), Jamdali Nsereko, Christopher Oja, Diannah Atwiine Joyce Kugonza, Elinah Namutebi n’abalala.
Bonna basuubirwa okwetaba mu mpaka z’ebikonde eziri ku kalenda ya UBF (ekibiina ekiddukanya ebikonde mu ggwanga), okuli eza ‘Intermediates, Cadets, National Open Boxing Championships’ n’endala.
