MUBS ekyeriisa nkuuli mu mipiira gy’emizannyo gya yunivasite egya Afrika.
2022 FASU – All Africa University games
Ensiike za MUBS mu kibinja B
- Kenyatta University 0-2 MUBS
- MUBS 5-1 American University of Cairo
- MUBS 3-0 University of Guinea
Semi
- MUBS 3-0 University of developmental studies
- Makerere 1-2 Kenyatta University
Fayinolo, 10:00 ez’olweggulo
- MUBS – Kenyatta University
Makerere University Business School (MUBS), ekyeriisa nkuuli mu mipiira gy’emizannyo gya yunivasite eza Afrika, egigenda mu maaso mu kibuga Nairobi ekya Kenya, bw’etuuse ku fayinolo nga tekubiddwaamu.
Ku Lwokuna (June 9, 2022) MUBS yakubye University of Developmental Studies ggoolo 3-0 ku semi nga zaateebeddwa Said Munir, Peter Ssebaggala ne Nasser Ssegabwe.
Kati MUBS egenda kuttunka ne Kenyatta University, abategesi ku fayinolo ezannyibwa leero (Lwakutaano, June 10, 2022) ku ssaawa 10:00 ez’olweggulo. Ttiimu zombi zaabadde mu kibinja B, nga MUBS yawangudde 2-0.
Mu kiseera kye kimu, Makerere University erwanira kyakusatu oluvannyuma lw’okukubwa Kenyatta University 2-1, ku semi.
Ttiimu zino zombi zaayiseewo butereevu okwetaba mu mizannyo gya yunivasite egy’ensi yonna (‘FISU World University Games’) egy’okubeera mu kibuga Jinjiang e China.
