Omuddusi Winnie Nanyondo asubiddwa omudaali mu misinde gy’e Morocco.
Omuddusi Winnie Nanyondo amalidde mu kyamusanvu mu misinde gya ‘Wanda Diamond League’ mmita 1500, egikomekkerezeddwa mu kiro ekikeesezza leero ku Mmande, n’asubwa omudaali.
Emisinde gino, egibadde mu kibuga Rabat ekya Morroco, mu kisaawe kya ‘International Mohammed VI’, Nanyondo agiddukidde eddakiika 4:02.74.
Bannansi ba Ethiopia bagyefuze bwe batutte ebifo ebisatu (3) ebisooka. Meshesha Hirut awangulidde mu ddakiika 3:57:30, n’addirirwa Hailu Freweyni (3:58:18) ne Embaye Axumawit (3:58:80).
Nanyondo yazze mu misinde gino ng’anoonya kuwangula mudaali, n’okwongera ku mutindo gwe nga yeetegekera emisinde gy’ensi yonna egya ‘World Athletics Championship egy’okubaawo omwezi ogujja mu Amerika, ssaako emizannyo gya Commonwealth egy’okuyindira e Bungereza wakati wa July 28 ne August 8.
Nanyondo asinga kujjukirwa olw’omudaali gw’ekikomo gwe yawangulira Uganda mu Commonwealth ya 2014 e Scotland.
