Ukraine esemberedde okwesogga World Cup y’e Qatar.
Ukraine abakyali mu lutalo ne Russia baafunye essuubi ly’okwesogga World Cup y’e Qatar singa banaawangula Wales ku Ssande. Kiddiridde Ukraine okuwangula Scotland (3-1) mu mupiira mwe baayoleserezza omutindo ogutabasuubirwamu ku Lwokusatu ekiro.
Ukraine, ye yakyadde mu Scotland kyokka yannyogozza bannyinimu bwe yabasonsese ggoolo nga bannyinimu bagoba bisiikirize. Kati Ukraine kigyetaagisa kuwangula Wales omwayo mu nsiike eneebeera e Cardiff okulaba nga bagenda mu World Cup eneebeera e Qatar wakati wa November ne December omwaka guno. Andriy Yarmolenko, Roman Yaremchuk ne Artem Dovbyk be baateebedde Ukraine.
Okuva mu February, Russia lwe yalumba Ukraine, ebyemizannyo byayo byonna byayimirira era ttiimu za liigi y’awaka, zonna zaayimirira ng’abazannyi abali ku ttiimu y’eggwanga, babadde beekung’aanyiza walala okutendekebwa. Omutendesi wa Scotland, Steve Clarke yakkirizza nga bwe baakubiddwa mu mazima kyokka n’asuubiza nti amaanyi bagenda kugazza ku kampeyini ya kwesogga Euro ya 2024. Ssita wa Ukraine, Oleksandr Zinchenko asuubizza bannansi baabwe okubanaazaako amaziga g’olutalo Russia lwe yabaggulako nga bakuba Wales ku Ssande bagende mu World Cup.
