Abaddusi 17 bebagenda okukiikirira Uganda mu mpaka za Africa.
Uganda yabadde erina okutwala abaddusi 25 wabula ebbula lwa ssente ligiremesezza n’erangirira 17.
Ekibiina ekitwala emisinde mu Uganda kyalangiridde ekibinja ky’abaddusi 17 abagenda okukiikirira Uganda mu mpaka za Africa eza Africa Senior Athletics Championships ezitandika nga June 08 – 12 mu Mauritius.
Omumyuka w’omuwandiisi w’ekibiina kino, Namayo Mawerere yagambye abaddusi abawera 30 be baali baayitibwa okukiika mu misinde gya Afrika era baali basuubira okutwalako 25 wabula ssente zibalemesezza.
Mu misinde gya Africa egisembyeyo gyali mu Asaba ekya Nigeria mu 2018, Uganda yavaayo n’emidaali esatu egy’ekikomo nga gyawangulwa Timothy Toroitich mu mbiro za mmita 10,000, Ronald Musagala mu 1,500 n’omukasusi w’olunyago Josephine Lalam.
Abaddusi abagenda kuliko: Nyamuhunge Jacent, Leni Shida, Aciru Knight, Chemusto Janat, Chelangat Sarah, Chebet Rachael Zena ne Lalam Josephine ate abasajja kuliko: Okot Benson, Adome Pius, Adoli Heron, Osuje Emmanuel, Mayanja Abu, Dradiga Tom, Chebrus Ali , Chemutai Ezekiel ,Otim Emmanuel ne Chanwengo Godfrey.
