Omuzanyi wa She Cranes Ruth Meeme asubiddwa egya Commonwealth.

Ruth Meeme owa She Cranes, taweddemu maanyi olw’okusubwa emizannyo gya  Commonwealth olw’obuvune mu vviivi

Ku bazannyi abaali mu ku ttiimu ya She Cranes eyawangula empaka za Pent Series wamu n’okumalira mu kifo ekyokubiri e Namibia omwaka oguwedde, Ruth Meeme ye yekka atayiddwa okwetegekera emizannyo gya Commonwealth.

Wadde nga guno gubadde mukisa gwe ogusemba okubeera ku ttiimu y’eggwanga eya She Cranes, obuvune mu vviivi bwamulemesezza.

“Okukiika mu mizannyo gya Commonwealth kintu kya kitiibwa eri omuzannyi yenna. Mbadde nneesunze okuddayo n’omwaka guno naye tekisobose. Bazannyi bannange mbakubiriza okukola ennyo n’okufuna emikwano nga batuuseeyo,” Meeme bwe yagambye.

Meeme yali ku ttiimu ya She Cranes eyasooka okukiika mu mizannyo gya Commonwealth egyali mu kibuga Gold Coast mu Australia mu 2018, ne bamalira mu kyomukaaga,

Egya Commonwealth egy’omwaka guno gyakubeera Birmingham mu Bungereza wakati wa July 28 ne August 8.

Uganda eri mu kibinja ekyokubiri omuli abategesi aba Bungereza era abalina ekikopo kino, New Zealand, Malawi, Trinidad & Tobago, ne Northern Ireland.