Nasser agenze Burundi kulwanira ngule.
MunnaYuganda omuvuzi w’emmotoka z’empaka, Yasin Nasser alumbye e Burundi n’ekigendererwa ky’okuwa abawagizi essanyu ku ngule ya Afrika.
Wiikendi ewedde, Yasin yawangudde ez’e Masaka n’asitukira mu ngule y’eggwanga eya NRC nga kati atunuulidde ya Afrika aggyeko Uganda ekikwa ky’emyaka 24 bukya Charles Muhangi (kati mugenzi) asemba kukikola mu 1999.
Nga tannasitula kwolekera Burundi, Yasin yagambye ayagala kuggyako bannansi nnyonta ya ngule eno. Yasin mumalirivu nti agenda kufuuka Munnayuganda owookubiri okugiwangula.
“Tugenze tukulembedde engule eno era twagala kudda nga tukyali ku ntikko. Twagala wiini era gye tukimye wadde nga tusuubira okuvuganya okw’amaanyi,” Yasin bwe yagambye.
Mu bavuzi abatadde Yasin ku bunkenke kuliko; Munnayuganda Jas Mangat ng’ono yeegeza mu ngule eno mu 2013 n’emulema. Omwaka guno Mangat ali mu kyakubiri nga Yasin amusinga obubonero 12 ne Munnakenya Karan Patel ali mu kyokusatu n’obubonero 30.
Uganda ekiikiriddwa abavuzi 4 ng’abalala ye Innocent Bwamiki ne Geoffrey Kirumira.
