Nuba yeegasse ku She Cranes.
Enkambi ya She Cranes, ttiimu y’eggwanga ey’okubaka, ezzeemu ebbugumu ssita waayo Mary Nuba bw’agyegasseeko mu kibuga Cape Town ekya South Africa. She Cranes yagenze okwetaba World Cup y’okubaka etandika nga July 28.
Okuva She Cranes lwe yatandika okutendekebwa mu April w’omwaka guno, babadde balindiridde Nuba azannyira mu Loughborough Lightning eya Bungereza lw’abegattako. Omuzannyi ono yalemeddwa okwegatta ku banne nga bakyali mu ggwanga mu kutendekebwa okw’awamu.
She Cranes yatuuse ku Lwamukaaga mu Cape Town gye baasanze Nuba era eggulo ku Ssande, baatendekeddwa ne ttiimu ku kisaawe kya University of Cape Town ekiwadde omutendesi n’abazannyi amaanyi.
Fred Mugerwa Tabale, omutendesi wa She Cranes agamba nti Nuba abadde amubobbya omutwe naye kati agenda kweyambisa ennaku zino ze basigazzaayo okugezesa sisitiimu ez’enjawulo z’ayagala okukozesa okusinziira ku mulabe ki gwe basisinkana.
“Enkwatagana kati gye njagala okuteekako essira kuba Nuba tumusanze ali ffiiti ate naffe tuzze tufunye okutendekebwa okumala,” Mugerwa bwe yategeezezza.
Eno ye World Cup ya Uganda ey’omulundi ogwokuna oluvannyuma lwa 1979, 2015 ne 2019. Baakuvuganyiza mu kibinja D omuli; New Zealand, Trinidad and Tobago ne Singapore gye baggulawo nayo nga July 28.
