Spurs ereese omutendesi waayo omupya.

Kiraabu ya Tottenham Hotspurs ey’e Bungereza ereese Ange Postecoglou okuba omutendesi waayo ku ndagaano ya myaka ena(4).

Postecoglou, afuuse omutendesi munnansi wa Australia agenda okusooka okutendeka omupiira mu liigi ya Bungereza eya Premier League, nga wa kubeegattako nga July 1.

Ono bamuggye mu kiraabu ya Celtic ey’e Scotland gy’awangudde ebikopo bitaano (5) mu myaka ebiri(2) nga mu sizoni eyaakakomekkerezebwa awangudde ebikopo by’ewaka byonna ebisatu(3).

Ssentebe wa kiraabu eno, Daniel Levy, agambye nti omutendesi gwe baleese bamusuubira okuleetawo essuula empya mu Spurs omuli n’okukyusa endowooza y’abazannyi, okwongera sipiidi mu nzannya n’okuzannya omupiira ogulumba omulabe nga tebamuwummuza.

Postecoglou, 57, asikidde Antonio Conte, eyafuumuulwa mu March w’omwaka guno olwo ttiimu n’esigala mu mitambo gy’eyali omumyuka we, Cristian Stellini naye oluvannyuma eyagobwa olwo Ryan Mason n’asigala ng’agitendeka okutuuka ku nkomerero ya sizoni.