Black Stars esitukidde mu kikopo kya Ligyoni.
Eyaliko ssita wa UPDF ne URA FC, Brian Bwete yalaze obumanyirivu bwe yayambye ttiimu ye okumegga CATDA FC ey’abatemi b’ennyama aba lufula ng’akwata peneti eyabayambye okusitukira mu kikopo kya Kampala ligyoni okutangaaza ttiimu yaabwe okuzannya mu Big League sizoni ejja.
Bwete yakutte peneti ya Sharif Ssengendo eyakutudde emitima gy’abawagizi ba CATDA abaabadde beeyiye e Lugogo ku kisaawe kya KCCA oluvannyuma lw’omupiira okukomekkerezebwa ggoolo 1-1 ezaatebeddwa Sharif Ssengendo owa CATDA ne Solomon Wafula owa Black Star.
Black Star Masanafu baasitukidde mu kikopo nga bakyampiyoni ba Kampala ligyoni nga era baasigazza ekigere kimu kyokka okulaba nga beesogga Big League sizoni ejja.
Bano baakuttunka ne kyampiyoni wa Buganda ligyoni Kiyindi Boys mu mupiira ogujja okusalawo ttiimu eneesogga Big League sizoni ejja.
Ttiimu zombi; Black Star Masanafu ne Kiyindi Boys zaasitukidde mu bukadde 2 okusobola okwetegekera fayinolo ejja egenda okubaako n’obugombe.
