Ham ereese amagezi agagenda okutangira amazzi okwanjaala mu kisaawe kya Nakivubo.

Abawagizi b’omupiira abaabadde beeraliikiridde nga bagamba nti ekisaawe ky’e Nakivubo ekiri mu kuzimbibwa kyandiddamu ne kyanjaalanga amazzi nga bwe gwali edda, bagumye.

Omugagga Hamis Kiggundu (Ham) akizimba alaze engeri ey’omulembe ky’akizimbyemu egenda okukitangira okwanjaalamu amazzi mu biseera ng’enkuba
efudemba.

Kijjidde mu kaseera ng’enkuba entonnye sizoni eno, eyonoonye ebintu bingi omuli n’okubotola enguudo eziwerako ne kisannyalaza entambula. Nakivubo omukadde yayanjaalangamu amazzi mu biseera by’enkuba ekyalemesanga n’egimu ku mipiira okuzannyibwa ng’amazzi gajjudde ekisaawe.

Oluusi abazannyi abajjanga okuzannya, baasookanga kusena mazzi mu kisaawe nga bakozesa obubaketi n’emifaliso olwo ne balyoka bazannya ekyakosanga ennyo emipiira egizannyirwayo.

Ham agamba nti ekisaawe kino bakizimbye nga bagoberera ebiragiro bya FIFA n’emisoso gyonna egifuga okuzimba mu lutobazzi.