Muhangi ow’ebikonde alumirizza aba NCS okumupaatiikako emisango.

Moses Muhangi pulezidenti w’ekibiina kya Uganda Boxing Federation (UBF) alumirizza akakiiko ka National Council Of Sports (NCS) okuba emabega w’emisango egimuvunaanibwa ku by’okujingirira empapula ku mbalirira y’ensimbi ezaamuweebwa Gavumenti.

Kiddiridde akakiiko ka Palamenti akavunaanyizibwa ku mbalirira n’okulondoola ensimbi za Gavumenti eziweebwa ebitongole ebyenjawulo aka Public Accounts Committee (PAC) okusindiika Muhangi mu Poliisi enonyereza ku buzzi bw’emisango (CID).

Akakiiko ka PAC nga kakuliddwa Asuman Basalirwa omubaka akiikirira Bugiri Municipality kakwasizza Muhangi eri aba CID ku bigambibwa nti yeenyigira mu kujingirira empapula mu mbalirira ya ssente ezaamuweebwa NCS.

Kategeezezza nti Muhangi wamu ne Lydia Namuleme eyali omubalirizi wa UBF baajingirira empapula ku nsimbi obukadde 8 ezaalina okugula emmere y’abazannyi ba The Bombers abaali beetegekera okukiikirira Uganda mu mizannyo gya Commonwealth egy’omwaka oguwedde.

Wabula bino Muhangi abyesambye bw’ategezezza nti NCS yeeri emabega waabyo mu kwagala okuttattanya erinnya lye.

Kinajjukirwa nti Muhangi azze alya matereeke n’abakungu ba NCS naddala Ssaabawandiisi w’akakiiko kano, Dr. Patrick Ogwel ng’ono gw’alumirizza okuba emabega w’ensonga zino.