Bamusaayimuto balaze amanyi mu liigi y’okububaka.

Liigi y’eggwanga ey’okubaka ey’ekibinja ekyokubiri eya Uganda Netball Second Division League yaggyiddwaawo akawuuwo ku Lwokubiri mu kisaawe e Kamwokya wakati mu kwolesa ebitone okuva mu bamusaayimuto.

Liigi eno ebaddemu ebbugumu nga buli ttiimu erwana kufuna nnamba egireeta mu liigi ya ssupa  eya Uganda Netball Super League .

Omupiira ogwasooseewo gwabadde wakati wa Chaya nga battunka ne Ugisha  nga omupiira wegugweredde nga Ugisha eguwangudde ku ggoolo 55 ku 42.

Abalala abazannye; DIT yakubye Bugema University ku ggoolo 51 ku 37 ate Dynamites n’ekuba Canaan ku ggoolo 48 ku 35 ate Canaan n’ekuba Chaya ku ggoolo 46 ku ggoolo 43.

Micheal Kakande, akulira akakiiko akategeka liigi ategeezezza nga bwe baafunye ttiimu entono kw’ezo ze baabadde basuubira  naye nga musanyufu n’omutindo abazannyi gwe baayolesezza.

Abazannyi bonna abazze mu mpaka zino balino ebitone era nga mannyi bajja kwongera ebugumu mu liigi yaffe esooka.  Ntwala omukisa guno okwebeza ttiimu zonna ezizze mu liigi eno kubanga okweteekamu ssente si kyangu,” Kakande bwe yategeezezza.

Ttiimu mukaaga ze zivuganya mu liigi eno esuubirwa okuggwa ku nkomerero y’omwezi ogujja era ttiimu essatu ezinaamalira mu bifo ebisooka zaakuyitamu butereevu okwesogga liigi y’eggwanga eya babinywera eya Uganda Netball Super League.