Abendiga batutte engabo yo’buwangunzi.
Bazzukulu ba Lwomwa abeddira Endiga basitukidde mu Ngabo y’ebika by’Abaganda ey’Omupiira gw’ebigere 2022, bakubye bazzukulu ba Ndugwa abeddira Olugave goolo 1-0, ku mupiira ogubaddeko n’Obugombe ku kisaawe e Wankulukuku.
Goolo y’ekika ky’Endiga eteebeddwa muyizzi tasubwa George Ssenkaaba agucangira mu Kitala FC, kyokka tiimu y’Olugave ebadde ekubye goolo y’ekyenkanyi neesazibwaamu olw’abazannyi okuteega.
Tiimu y’Omupiira gw’Abawala ey’ekika ky’Engeye ekubye tiimu y’Emmamba obugoba 37 – 35, era nayo neesitukira mu ngabo y’Omwaka 2022.
Katikkiro wa Buganda Charles Peter Mayiga yakwasizza abawanguzi bonna engabo, ensimbi enkalu n’emidaali.
