Aba kiraabu Sailfish batongozza amaka amaggya.

Ku wiikendi batongozza okutandika okubangulira abawuzi ku kidiba kya Eritine Swimming Club e Buwaate mu ggombolola ye Kira nga kino bakigasse ku kye baludde nga babangulirako abawuzi ku ssomero lya Ambrosoli International School e Bugoloobi mu Nakawa.

Akulira okutendeka mu kiraabu ya Sailfish, Joseph Kaboggoza agambye nti abazadde okuva mu bitundu by’e Namugongo, Kira n’awalala babadde bakaluubirwa okutwala abaana e Bugoloobi n’ensonga nnyingi endala era nga kati bagenda kwongera okuggyayo ebitone bya bamusaayimuto mu bujjuvu.

“Tumaze emyaka 11 nga tusinziira ku kidiba ky’essomero lya Ambrosoli e Bugoloobi wabula nga kifunda ate nga kya ssomero. Tubadde tetubangula bawuzi mu biseera eby’oku makya. Kino tukigasse ku kye tubadde nakyo era nga kati abazadde ababadde bakaluubirirwa okutambuza abaana okuva eno okugenda e Bugoloobi bawewukiddwa,” Kaboggoza bw’ategeezezza.

“Ekidiba kino kiri ku mutindo gw’ebyo ebitegekerwamu empaka z’eggwanga era n’ekibiina kya Uganda Swimming Federation (USF) kijja kutandika okutegekera wano empaka nga ffe tukyaza mu maka gaffe kubanga tubadde tupangisa bupangisa nga tutuusizza okutegeka empaka,” Kaboggoza bw’ayongeddeko.