Entandikwa ya liigi y’ebitongole tetandisse bbubi.

Abakozi ba kkampuni ez’enjawulo boolesezza ebitone mu kucanga omupiira n’emizannyo emirala mu luzannya olusooka olw’empaka z’ebitongole (Corporate League).

Bino byabadde ku kisaawe kya Kyaddondo Rugby Ground e Lugogo oluvannyuma lw’abakulira empaka zino abaakulembeddwa, okuziggulawo ku Ssande. Mu gimu ku mipiira egyanyumidde abalabi, gwe gwa ttiimu ya Buganda Land Board (BLB) ng’kubwa URA (2-0). Ttiimu zombi zaazannye omupiira ogw’okufiirawo okulaba nga zifuna obuwanguzi mu mupiira ogusooka.

Omupiira guno gwatandikidde mu bbugumu eritagambika nga buli ludda lukola ennumba ez’okumukumu wadde nga gye byaweeredde nga BLB bagiteebye ggoolo 2 n’efuluma ekisaawe nga beekwasa nti embeera y’ekisaawe yabadde mbi ekyabalemesezza okuzannya omupiira gw’okulabagana obulungi.

“Omuddo gw’ekisaawe kino gubuukabuuka naye ensonga eno tugenda kugisalira amagezi mu mipiira eginaddako,” Wilber Mubiru omu ku bazannyi ba BLB bwe yategeezezza.

Mu miralala, Vision Group yakoze amaliri ga (0-0) ne Ballore Logistics, NSSF n’ekubwa I&M ate bannantameggwa b’empaka zino, aba Hotel Africana ne batandikira we baakoma sizoni ewedde bwe baakubye UMEME ggoolo 2-0.

Empaka z’omulundi guno zeetabiddwaamu ttiimu 85 era ng’omuwanguzi waakusitukira mu kikopo ku nkomerero y’omwaka. Zaakuzannyibwanga ku buli nkomerero y’omwezi okusobozesa kkampuni ez’enjawulo okwongera okuzimba enkolagana mu mirimu egy’enjawulo gye zikola.