Akademi y’abaana etandikidwawo okuzuula ebitone byabwe.

Abazadde ku kyalo Ggangu ku lw’e Busaabala basambira nnyuma nga jjanzi oluvannyuma lw’omuzirakisa okubatandikirawo akademi y’abaana baabwe abawala nga kino kibadde kirooto kyabwe okumala emyaka mingi.

Rogers Cyrus Kakooza amaze ebbanga mu kuzuula ebitone okwetooloola eggwanga, enkambi kati yagikubye Ggangu ng’atunuulidde kwongera kunoonya abazannyi abanaggumiza Crested Cranes ttiimu y’eggwanga ey’omupiira gw’abakazi gye bujja ne ttiimu z’omupiira gw’abakazi endala.

Kakooza agamba nti, “Nasoma obutendesi ngezeeko okukyusa obulamu bw’abavubuka basobole okubeera obulungi nga bayita mu kuzannya omupiira.” Essaawa eno nnina ebisaanyizo by’okubeera omutendesi w’omu kitundu okuva mu Premier Skills ey’e Bungereza n’endala okuva mu World Coaches ey’e Denmark. Natandika n’abaana balenzi abaali balonda sikulaapu mu 2017 ku kisaawe kya Movit e Namasuba, wabula bano baalina ebiruubirirwa bingi nga sisobola kubaggyamu kiramu kwe kusalawo okudda ku kutendeka abawala.”

Omu ku bazadde b’omu kitundu Evalyne Katusiime yagambye nti, “Nga omuzadde, njagaliza omwana wange ekisinga kati omupiira guyamba abaana abawerako nga bafuna bbaasale ezibayamba mu kusoma era eno y’ensonga lwaki nzikiriza n’abaana okuguzannya kuba gwe basomerako.”