Christian Atsu asangiddwa nga yafiira mu musisi w’e Turkey.
Oluvannyuma lw’ennaku 11 ng’abadduukirize banoonya Munnansi wa Ghana omusambi w’omupiira, Christian Atsu bamuguddeko ng’amafunfugu gaamuziika mu musisi eyakuba Turkey ne Syria kati ennaku 12 eziyise.
Abadde agenti wa Atsu, Murat Uzunmehmet y’akakasizza nti omuzannyi we ono eyaliko mu FC Porto, Chelsea, Málaga ne Newcastle asangiddwa nga yafa dda!
Atsu 31, yeegasse ku bantu enkumu abaafiiridde mu mutenzaggulu ono ng’okugenda e Turkey yava Bungereza gye yali azannyidde ku kiraabu omuli Chelsea ne Newcastle gye yava okwegatta ku Hatayspor ey’e Turkey.
W’afiiridde nga ttiimu y’eggwanga – Ghana agizannyidde emipiira 65 n’abateebera ggoolo 9 era yali mu ttiimu y’emu nga bazannya mu Africa Cup wa 2013 ne 2015 kw’ossa World Cup wa 2014.
Emirabo egisoba mu 43,000 gye gyakazuulwa bukya musisi ono agoya ebitundu bya Turkey ne Syria.
