Ttiimu y’eggwanga eya basketball w’abakazi etandise okwetegekera ez’okusunsulamu.
Gazelles, ttiimu y’eggwanga ey’abakazi ba basketball yeesozze MTN Arena okutandika okutendekebwa nga beetegekera ez’okusunsulamu ttiimu eza Zone V ezineetaba mu kikopo kya Afrika mu kibuga Kigali ekya Rwanda mu July w’omwaka guno.
Uganda ebadde yakoma okukyaza empaka zino wakati wa June 26 ne July 1, 2019 wabula omulundi ogwo ttiimu zombi Gazelles (abakazi) ne Silverbacks (abasajja) zaamalira mu kifo kyakusatu ne ziremererwa okukiika.
Omulundi guno abazannyi b’awaka 28 be bayitiddwa nga batandise okutendekebwa leero (January 16) okutuusa wakati wa February 14 – 19, 2023 ez’okusunsulamu empaka lwe zinaazannyibwa mu MTN Arena e Lugogo.
Gazelles ebadde yaakasubwa okwetaba mu mpaka ze zimu wakati wa July 12-17, 2021 ezaali mu kibuga Kigali ekya Rwanda olw’ebbula ly’ensimbi, omulundi guno baagala kwenaazaako maziga nga beesogga eza Afrika.
Singa Gazelles eyitawo okwesogga eza Afrika, ejja kuba ekikoze omulundi ogwokusatu oluvannyuma lwa 1997 lwe baasooka okukikola ne 2015 ezaali e Cameroon.
Mu ngeri y’emu FUBA ekibiina ekifuga omuzannyo guno mu ggwanga kyaleese omutendesi Omuzungu enzaalwa ya Spain, Alberto Atuna okubeera mu mitambo gya ttiimu eno ng’ayambibwako; Nicholas Natuhereza, Ali Mavita ne Henry Malinga.
Ttiimu eyitiddwa
Brenda Ekone, Flavia Oketcho, Evelyne Nakiyingi ne Rita Imanishimwe (JKL Lady Dolphins), Sarah Ageno, Moreen Amoding ne Zaina Lokwameri (JT Lady Jaguars), Shakira Nanvubya, Birdget Aber, Agatha Kamwada ne Azida Nabayunga (UCU Lady Canons), Becky Longom, Angella Namirimu, Rebecca Anyu ne Leticia Awor (KCCA Leopards), Fildauce Namuleme, Hope Akello, Sharon Kirabo, Perus Nyamwenge ne Mary Amaniyo (KIU Rangers), Margaret Baagala ne Faridah Kandondi (KU Ladies), Shila Lamunu ne Diana Letaru (Magic Stormers), Winfred Akello (Miracle), Sarah Namale (Nabisunsa Girls), Shadia Mbwali (Nkumba Lady Marines) ne Sylvia Nantongo (SMASK).
