UCU ne Nkozi balwanira fayinolo.
Mu semi za Pepsi University Football League.
UMU –UCU,Nkozi
Uganda Christian University (UCU) abalina ekikopo kya liigi ya yunivasite balumbye Uganda Martyrs Nkozi nga banoonya maliri okwesogga fayinolo omulundi ogwookubiri ogw’omuddiring’anwa.
Bali ku kisaawe e Nkozi mu gw’okudding’ana ku semi za Pepsi University Football League oluvannyuma lwa UCU okuwangula ensiike eyasooka (1-0) wiiki bbiri emabega e Mukono.
Sizoni eno Nkozi tekubiddwaamu awaka, yakateebwamu ggoolo emu yokka awaka,yakuba Gulu (2-0),Kampala University (2-0) ,Ndejje University (5-0) ne Bugema (2-1).
Collins Ahumuza atendeka UCU agamba nti bagenda kukamula UMU entuuyo okutuusa nga bagiwanduddemu.
‘’Nkozi obutatuteebamu ewaffe e Mukono y’enkizo gye tulina okuzimbirako era tugenda ewaabwe nga tunoonya maliri kye nzikiriza nti tusobola okugafuna,nsaba abawagizi babeere bagumu nti UCU egenda ku fayinolo’’Ahumuza bwe yategeezezza.
UCU tegenda kubeera na muteebi Isaac Ofoywroth eyaweebwa kkaadi emyuufu mu siike eyasooka e Mukono ate ne Kennedy Kasozi owa UMU naye tagenda kuzannya lwa kkaadi emyuufu. Awangula wakati wa Nkozi ne UCU waakulinda anaayitawo wakati wa St.Lawrence ne Makerere University Business Schools(MUBS) abadding’ana ku lwokubiri lwa wiiki ejja.
