Ba kapiteeni 4 Lutalo bayungudde okuduumira Crested Cranes mu za Afrika e Marrakesh.
Omutendesi wa Crested Cranes (ttiimu y’eggwanga ey’omupiira gw’abakazi) George William Lutalo alangiridde ba kapiteeni bana (4) abagenda okudduumira ttiimu mu za Afrika (TotalEnergies Africa Women Cup of Nations).
2022 Africa Women Cup of Nations
Ggoolokippa Ruth Aturo owa Katkan Tyovaen Palloillijat eya Finland ye kapiteeni asooka, ng’ono y’abaddeko okuva 2019 bwe yasikira Tracy Jones Akiror eyali agenze ku pulo mu AFC Ann Arbor eya Amerika gy’azannyira ogw’ensimbi.
Waakumyukibwa Hasifah Nassuna owa UCU Lady Cardinals, ng’ono y’abadde kapiteeni nga Crested Cranes ewangula ekikopo ky’empaka za CECAFA (CECAFA Senior Women’s Championship) ezibadde ziyindira e Njeru wiiki bbiri emabega.
Daisy Nakaziro owa Uganda Martyrs High School WFC Lubaga eyasitukidde mu kirabo kya ggoolokippa w’empaka za CECAFA ezibadde e Njeru, ye mumyuka nnamba bbiri. Nakaziro era ye yali kapiteeni nga Lady Doves FC ey’e Masindi esitukira mu kikopo kya ‘FUFA Women Super League’ mu sizoni ya 2020/2021.
Fauzia Najjemba azannya ogw’ensimbi mu BIIK Shymkent eya Kazakhstan ye mumyuka nnamba ssatu. Ono ye yali kapiteeni wa Kampala Queens FC mu ‘FUFA Women Super League’ sizoni ewedde era n’adduumira n’eyabawala abatasussa myaka 20 mu z’okusunsulamu amawanga agaali gagenda mu z’ensi yonna (FIFA U20 Women’s World Cup Qualifiers).
