Crested Cranes yakutandika ne Rwanda mu za CECAFA w’abakazi e Njeru.
Omutendesi wa Crested Cranes ttiimu y’eggwanga enkulu ey’abakazi abasamba omupiira, George William Lutalo yeekanzeemu olw’abamu ku bappulo be yali ayise obutalabika mu za CECAFA ekimuwadde ekifaananyi ky’eza AWCON ekirala.
2022 CECAFA Women Championship
- Uganda – Rwanda (Lwakusatu)
- Djibouti – Uganda (Lwakutaano)
- Uganda – Burundi (Ssande)
Ku Lwokusatu lwa wiiki eno Uganda eggulawo ne Rwanda mu z’ekikopo kya 2022 CECAFA Women Championship ku kisaawe kya FUFA Technical Center e Njeru, empaka omutendesi Lutalo zaayagala okweyambisa okufuna ttiimu kabiriiti ey’okuzannya ez’Africa (2022 Women Africa Cup of Nations) mu July.
Ono yali yayita bappulo 15 wabula mukaaga bokka be balabiseeko mu nkambi okuli; Juliet Nalukenge (Appolon Ladies FC eya Cyprus), Shirazi Natasha (Maccabi Kishronot Hadera eya Israel), Salena Allibhai (KAA Gent eya Belgium), Christine Madam (Gaspo FC eya Kenya), Joan Nabirye (Vihiga Queens eya Kenya), Sheebah Zalwango (FC Amani eya DR Congo) ne Sandra Nabweteme (atalina ttiimu mu Amerika).
Lutalo agamba nti yali asuubira bonna okubeerawo mu za CECAFA zino kimuwe ekifaananyi ekirungi eky’eza TotalEnergies AWCON mu ggwanga lya Morocco wabula mugumu nti abaliwo bagenda kukola bulungi ate oluvannyuma ajja kuzimba ttiimu eneezannya mu z’Afrika.
“Ekingumya nti mu ttiimu zaabwe gye bali bazannya, kijja kuba kyetaagisa ku kunoonya nkwatagana ku kisaawe ne bano abazannye CECAFA, naye kati obwanga mbutunuulizza kukola bulungi mu zetugendamu era nzikiriza obuwanguzi tubulina,” Lutalo bwe yategeezezza.
Guno mulundi gwakuna nga Uganda yeetaba mu za CECAFA w’abakazi, bali mu kibinja A omuli; Rwanda, Burundi ne Djibouti, ttiimu munaana ze zeetabye mu z’omwaka guno
