Man City yeetegese okulangirira omuteebi Erling Haaland wiiki eno.

Kiraabu ya Manchester City yeetegese okulangirira nga bw’eguze omuteebi Erling Haaland okuva nu  Borussia Dortmund ey’e Germany okusinziira ku nsonda ezeesigika.

Haaland , 21 akubye ggoolo ezeewuunyisizza ensi okuba lwe yeegatta ku Dortmund kubanga yaakateeba ggoolo 85 mu mipiira 88 ne kimufuula omu ku bazannyi b’omupiira aboogerwako mu kulengera akatimba ensangi zino era okusinziira ku mikutu gy’amawulire omuli The Athletic ne The Sun, bannantameggwa b’ekikopo kya ligi y’e  Bungereza eya Premier League aba Man City be baawangudde akalulu mu kugula omuzannyi ono.

Ensonda ziraga nti City yamaze dda okukkaanya ne Haaland ng’ekisigadde kwe kumaliriza ne Dortmund mu ddiiru esuubirwa okuggweera mu bukadde bwa Paawundi 64.

Kigambibwa nti mu ddiru eno Haaland wa kufunanga e,mitwalo gya Paawundi 50 buli wiiki nga wa kuweebwa endagaano ya myaka 5.