Tiimu ya Makerere ewangudde empaka z’okuwuga 2023.
Makerere erangiriddwa ku bwa kyampiyoni bw’okuwuga oluvannyuma lw’okufutizza ttiimu za yunivasite 10 mizannyo gya AUUS egimaze ennaku nnya (4) nga giyindira ku Uganda Christian University e Mukono.
Makerere ye yadduukiridde abategesi aba UCU n’ekidiba abayizi mwe bawugidde, wabula n’egaana yunivasite endala okugijjoogera ewaayo bwe yakukumbye omugatte gwa midaali 1211 nga kuliko egy’abawala 641 n’abasajja 570.
Jacob Mugisha, Priscilla Erapu, Charity Nannungi, Ruth Zulaika Nabudo, Grace Nakalyowa Kirabo, Dorah Nankunda, Hannat Nakimuli n’abalala be baafunidde Makerere zaabu mu mitendera egy’enjawulo.
Ndejje University ababadde bakyampiyoni b’okuwuga sizoni ewedde 2019, omulundi guno bakutte kyakusatu bwe baakung’aanyizza omugatte gwa midaali 626 nga gyonna gya basajja bokka.
Emizannyo gino gikomekkerezebwa mu butongole ku Lwokuna (December 21, 2023) nga yunivasite 23 ze zeetabye mu mizannyo 17 egivuganyiziddwaako.
