Uganda eyolesezza obukugu bw’ewangudde Kenya mu maanyi.
Uganda Rugby Cranes yafaananidde ddala nga South Afrika bwe yawangudde ku Kenya ekikopo kya Victoria Cup 2023 ku kagoba kamu mu nsiitaano eyatadde abawagizi ba ttiimu zombi ku bunkenke ku kisaawe kya Kings Park e Bweyogerere ku Ssande.
Embeera eno yafaananidde ddala eya South Afrika nayo yamegga New Zealand ku bugoba 12-11 mu kikopo ky’ensi yonna ekya rugby omwezi oguwedde mu Bufalansa.
Abawagizi ba baabuze okufa essanyu wakati mu kwewanika emitima Kenya bwe yasoose okukulembera omuzannyo ku bugoba 12-0 okutuusa kapiteeni wa Uganda, Ivan Magomu bwe yateebye peneti bbiri ne bafuna obubonero mukaaga. Baayongedde okunyigiriza nga ne Kenya bw’eyongera okuteeba.
Ng’ebula eddakiika ttaano, Kenya yabadde ekulembedde ku bugoba 20-18 wabula omuzannyi wa Cranes, Ian Walker Junior n’ateebera Uganda peneti mu ddakiika esembayo ne bongerako obubonero busatu era ne guggweera awo Uganda n’ewangudde (21-20).
Omutendesi Fred Mudhoola yategeezezza nti oluvannyuma lw’okulaba Kenya ng’ezannya Zambia, baalabye emiwaatwa mu ttiimu eyo wabula nga kati batandise okwetegekera ogw’okudding’ana mu kikopo kya Elgon Cup e Kenya ku wiikendi eno.
“Gwabaddeko vvaawompitewo. Okulaba ebituli mu ttiimu ya Kenya ng’esamba Zambia kyatuyambye ate n’abazannyi okuwummula ekimala bukya bazannya Zambia nakyo kyatuyambye,” Mudhoola bwe yategeezezza.
Magomu asuubizza nti baakwongera okuteekawo okuvuganya nga badding’anye era ttiimu esuubirwa kusitula ku Lwokuna okugenda e Kisumu mu Kenya badding’ane ku Lwokumaaga ku fayinolo ya Elgon Cup.
