Ttiimu ya Kenya ewangudde empaka za rugby.
Kiraabu ya Nondescripts Rugby Club nga be bakyampiyoni ba liigi y’e Kenya omwaka oguwedde, basitukidde mu kikopo kya Kitaka 10’s ne kavvu wa 3,000,000/- (obukadde busatu) oluvannyuma lw’okumegga Pirates eya Uganda ku bugoba (5-0).
Mu nsiitaano eyamaze ennaku bbiri ku kisaawe kya Legends e Lugogo, Bannakenya baalaze nti balina eryanyi mu muzannyo guno ogw’abazannyi 10 ku buli ludda nga zeetabiddwaamu kiraabu 12 ez’abasajja n’ezabakazi nnya.
Zaabadde zaakujjukira omugenzi Edward Kitaka Kizito eyalwanirira okutumbula omuzannyo gwa rugby mu kiraabu ya Kobs era n’okugwagazisa abavubuka Abafrika nga gwali gusinga kuzannyibwa Bazungu.
Zaategekeddwa aba kiraabu ya Kobs mu bijaguzo byayo eby’okuweza emyaka 60. Mu bakazi, Black Pearls ye yakyetisse era n’efuna ensimbi 1,500,000/- ng’eno yawangudde endala ezeetabyemu.
“Empaka zino zaakuzannyibwa buli mwaka nga zeetegekera sizoni ya liigi ey’abazannyi 15. Tusuubira kiraabu endala okwegattako omwaka ogujja,” ssentebe wa Kobs, Tonny Stone Luggya bwe yategeezezza.
Kobs eyategese yamalidde mu kyakusatu nga yakubye Rhino ku bugoba 17-5.
Mukyala w’omugenzi, Lilian Nabulime Kitaka y’omu ku baakwasizza abawanguzi ebikopo.
