Masaka ewutudde Nansana Galaxy n’erinnya ku ntikko ya liigi.
Olutindo lw’omugga Katonga olwamenyese ne lusalako abagenda n’okuva e Masaka lulemesezza kiraabu ya ludo eya Masaka Giants okuzannyira omwayo nga kati amakanda egakubye Mpereerwe gy’ekyaliza enzannya zaayo eza liigi ya ludo.
Enkambi baagikubye ku bbaala ya Rock 24/7 era amaka amapya baagafunyeemu omukisa bwe baawangudde bakyampiyoni ba liigi eno aba Nansana Galaxy ku bugoba 3-1. Liigi eno etuuse w’enyumira kuba kiraabu ezimu zitandise okusoomooza Nansana Galaxy emaze ebbanga nga ye nnantameggwa.
Masaka Giants okumegga Nansana Galaxy kubadde kulaga mutindo ogwa waggulu okusinziira ku kapiteeni waayo Huzaifa Matovu. Matovu, yategeezezza nti okwekkiririzaamu, okukolera awamu n’okufuna abazannyi abalungi bye bimu ku biyambye Masaka Giants okulinnya ku ntikko ya liigi.
“Abazannyi baagoberedde ebiragiro by’omutendesi Ham Ndawula. Okwekkiririzaamu, okwerabira nti aba Nansana baatukuba mu muzannyo ogwasembayo mu liigi ewedde wamu n’okuleeta abazannyi abalungi okuli; Tom Masozi, Musa Nsubuga bituyambye nnyo,” Matovu bw’ategeezezza.
Simon Nyangabi y’asinze okuteebera Masaka Giants bw’ateebye ggoolo nnya. Kati Masaka Giants ekulembedde ekimeeza kya liigi ku bunobero 16 ng’esibaganye ne Kazo. Masaka Giants ekubiddwaamu empiki 60 ate Nansana Galaxy yaakakubwamu 65. Liigi erimu ttiimu 14 ng’enzannya eziddamu ku Lwokuna.
