JKL Dolphins efuuse omuteego mu liigi y’ensero.
JKL Lady Dolphins bakyampiyoni ba liigi y’abakazi mu basketball emirundi ebiri egy’omuddiring’anwa (2018/2019) balinnyisizza ggiya bwe baafootodde Nkumba Lady Marines ensero 130-49 ne beenywereza ku ntikko n’obubonero 7.
Ku Ssande mu nsiike 5 ezaazanyiddwa mu kisaawe kya MTN Arena e Lugogo, abazannyi ba JKL Lady Dolphins baakoze ekyafaayo kya buli omu okuva mu kisaawe ng’ateebye ensero ezisukka mu 10. Brenda Ekone yateebye (20), Christine Namulumba (18), Leticia Awor (16), Becky Longom (16), Hope Akello (14), Stella Nikuze (13) ne Grant Generous (13).
1&xpc=n9E1maZNF1&p=https%3A//www.bukedde.co.ug&dtd=202 JKL yaakawangula ensiike ssatu bwe yakuba UCU Lady Canons (67-51), n’emegga Kampala University Ladies (74-50) n’ekubwa KCCA (63-58), eddako kuzannya KIU Rangers ku Lwokutaano e Lugogo.
Nkumba Lady Marines by’esiba bye bikutuka, yaakazannya ensiike ssatu zonna terinaamu wiini. Yakubwa JT Lady Jaguars (75-24), Nabisunsa n’egidda mu biwundu (66-58) ne JKL Lady Dolphins eyabadde ebattira mu MTN Arena.
Mu ngeri y’emu City Oilers yawezezza ensiike mukaaga ez’omuddiring’anwa nga tekubiddwaamu bukya liigi eno etandika omwezi oguwedde (March 19). Eggulo yaggye ku bannamagye aba UPDF Tomahawks emmundu zaabwe n’ebakuba ensero (87-53).
Titus Lual ye yasinze okuteebera City Oilers n’ensero 25, Fayed Bbaale eyaakabeegattako okuva mu UCU Canons (19), Lauk Ruai (10) n’abalala. Bakulembedde n’obubonero 12. Ate Arthur Wanyoto yakoledde UPDF ensero 16, n’addirirwa Michael Kojo (10) n’abalala.
UPDF yasooka kukubwa KCCA Panthers (62-58), erinayo wiini emu yokka gye yaggya ku Kampala Rockets mu nsiike yaabwe eyaggulawo nga kati bali mu kya 7 n’obubonero 4.
