Embalirira eyissidwa aba FMU ya kawumbi kalamba.
Ekibiina ekitwala omuzannyo gwe mmotoka z’empaka mu ggwanga ekya Federation of Motorsport clubs of Uganda (FMU) kiyisiza embaliria ya buwumbi bubiri n’obukade 29 okuddukanya emirimu gyakyo omwaka guno
Pulezidenti wa FMU, Dipu Ruparelia yakuutidde bammemba b’ekibiina kino okutwala obuvunaanyizibwa okulaba nga batuukiriza ebyetaago by’ekibiina.
“Wadde tulina essuubi nti Gavumenti y’egenda okuvujjirira ekitundu ekisinga obunene ku mbalirira yaffe, tuleme kwesuulirayo gwa nnaggamba tusasule ebisale ebituweereddwa nga kiraabu, abavuzi n’abalala abalina okuwaayo ensimbi mu kittavvu kya FMU,” Dipu bwe yagambye.
Dipu yabade akulembeddemu bammemba ba FMU mu ttabamiruka waabwe owa buli mwaka eyabaddewo gye buvuddeko e Lugogo.
FMU esuubira okufuna akawumbi 1 n’obukadde 200 omwaka gw’ebyensimbi guno kyokka baakwongerako obukadde 800 nga bazisuubira okuva mu Gavumenti ziyambe mu kutegeka empaka eziri ku ddaala lya Afrika okuli Pearl of Africa ne Fim Africa.
Obukadde 22 busuubirwa okuva mu bammemba abeewandiisa mu mpaka ez’enjawulo.
Dipu yeetondedde abakiise olw’omubalirizi w’ebitabo by’ekibiina obutabeerawo.
Ssentebe wa United Motorsport Club (UMOSPOC), Justin Mungoma yasabye FMU okutangaaza lwaki mu myaka esatu gye babadde mu bukulembeze tebabeerangako na mubalirizi wa bitabo.
“Lwaki buli mwaka kino tewabaawo mubalirizi mu ttabamiruka ng’ate buli kimu kiweebwayo mu budde,” Mungoma yasabye okutangaazibwa.
Mu kwanukula, Dipu yagambye nti ebiseera ebisinga lipooti okuva mu bategesi teziweebwayo mu budde ekibalemesa okulondoola lipooti ezikolebwa.
