Chisano yeevuma buvune obumulemesezza liigi.

Omuzannyi wa Heathens, Jonathan Chisano agambye nti yeevuma buvune bwe yafuna mu luzannya olwaggulawo liigi ya Nile Special Rugby League kuba bukyamulemesezza okuddamu okuyamba kiraabu ye.

Chisano, yafuna obuvune nga bakyalidde Pirates ku kisaawe kya King’s Park e Bweyogerere nga kati bwakamusubya emizannyo ebiri.

Yasinze kusubwa gwa Kobs eyabadde ebatadde ku bunkenke okutuusa mu sikonda 30 ezaabadde zibulayo omuzannyo guggwe.

“Ndi musanyufu okulaba nga tuwangudde wadde nga gwabadde gwa ku kaguwa. Obwedda kinnumira muli okulaba nga Kobs etutwalaganya kuba baabadde batukulembedde ku bugoba 15-14 nga gugenda okuggwa okutuusa Katonda lwe yayise mu Aaron Ofoywroth ne tuwangulira ku bugoba 17-15,” Chisano bwe yategeezezza.

Ensiitaano ya Kobs ne Heathens efaananako eya bakazi baggya.

Omutendesi wa Heathens, Mohammed Athio atetegeezezza nti wadde nga bali mu kyakuna ku ttebo, batunuulidde omuzannyo gwa Rhino gye bakyaza ku Lwomukaaga ku kisaawe kya Kyaddondo e Lugogo gye baagala okufunako wiini mu kaweefube w’okweddiza ekikopo kya liigi kye baawangula omwaka oguwedde.

Yagambye nti Chisano alinze musawo amukakase nti assuuse wabula nga n’ogwa Rhino tasuubirwa kuguzannya.

Mu kiseera kye kimu, liigi y’abakazi nayo eri mu ggiya nga Thunderbirds ekulembedde oluvannyuma lw’okutimpula Ewes ku bugoba 110-05 omwayo ate Black Pirates nayo n’ekubira Avengers omwayo ku bugoba 19-08.