Hippos eyongezza ggiya nga beetegera AFCON.
![](https://endibbasports.com/wp-content/uploads/2023/01/image.webp)
‘The Hippos’ (ttiimu y’eggwanga ey’abasajja abatasussa myaka 20) ekubiddwa ensiike esoose kw’ezo ettaano ez’omukwano ze yaakazannya nga yeetegekera empaka z’ekikopo kya Afrika omwezi ogujja.
![](https://endibbasports.com/wp-content/uploads/2023/01/PM-11-1024x307.jpg)
Gaddafi FC ezannyira mu liigi y’eggwanga ey’oku ntikko y’amezze Hippos 2-1 ku kisaawe kya Kyabazinga e Bugembe wabula omutendesi Jackson Mayanja akyali mugumu nti ttiimu gy’alina nnungi era ejja kukola bulungi mu za Afrika.
Hippos kati ewezezza omwezi mulamba ng’etendekebwa ku kisaawe kya FUFA Technical Center e Njeru. Ku gy’omukwano etaano gy’ezannye ewanguddeko 4; yakuba Jinja North eya Big League (1-0), n’emegga BUL FC emirundi ebiri (1-0 ne 2-0) wamu ne wiini ya (3-1) ku Busoga United.
Omutendesi Mayanja agamba nti Gaddafi okubakuba kiddiridde okuwa omukisa buli muzannyi ali mu nkambi awatali kusosola ttiimu esooka oba eyookubiri naye teyejjusa kubawangulira ku ggoolo (2-1).
“Namaze okusunsulamu abazannyi abali ku ttiimu esooka era abajja okugenda e Misiri mu za Afrika, naye leero njagadde bonna n’abaasaliddwaako okubawa omukisa bazannyemu,” Mayanja bwe yalambuludde.
Ku Ssande, The Hippos egenda kujjululwa okuva e Njeru ereetebwe ku Paradise Hotel e Kisaasi gy’ejja okusinziira okugenda mu za Afrika ezitandika wakati wa February 19 ne March 11, 2023.