Ttiimu y’okubaka  eya UCU yeesunga kuwangula zaabu mu gya yunivasite.

Ettendekero lya Uganda Christian University lye limu ku matendekero agazannyira mu liigi y’eggwanga ey’omuzannyo gw’okubaka eya National Netball Super League.

UCU era lye limu ku matendekero agayungudde ttiimu y’okubaka mu mizannyo gya yunivasite egy’obuvanjuba bwa Afrika egya East Africa University Games egisululira okutandika ku yunivasite ya Ndejje mu Luweero.

Ttiimu etendekebwa Nelson Bogere nga yaakuduumirwa Aisha Amuge era bawaga nti okuvuganya kwe baafunye mu liigi, kwakubayamba okuwangula ekikopo ky’okubaka eky’omwaka guno.

“Ekirungi emizannyo gino gitandika ng’ekitundu kya liigi ekisooka kyakawummula. Liigi etuwadde okuvuganya kwe tubadde twetaaga era mmanyi tewali ttiimu egenda kutuwunyamu mu mizannyo gino,” Bogere bwe yategeezezza.

Ayongerako nti ng’oggyeeko ssenta waabwe atakkirizibwa kuzanya mu mpaka zino kuba si muyizi, ttiimu yaabwe tekyuka era baakweyambisa obumu obuli mu ttiimu okuwangula ekikopo kino.

Emizannyo gya yunivasite egy’omulundi ogw’e 12 gyakuyinda wakati wa December 16- 21. Abazannyi baakuvuganya mu mizannyo egyenjawulo 21.